སྐྱིད་ཟུར་ལགས་ཀྱི་གཏམ་རྒྱུད་ཁག་གཅིག༼སྟོད་ཆ།༽

ཡོངས་ཁུངས།   བོད་ལྗོངས་འཕྲིན་དྲ། རྩོམ་པོ།  དམངས་ཁྲོད། སྤེལ་དུས།  2021-04-12

སྐྱིད་ཟུར་ལགས་ཞེས་པ་ཁོང་ནི་ཉེ་རབས་ལོ་རྒྱུས་ཐོག་དངོས་སུ་བྱུང་བའི་མི་སྣ་ཞིག་རེད།  ཁོང་ཉིད་མ་གཞི་བོད་ས་གནས་སྲིད་གཞུང་གི་ལྟོ་ཟན་དྲུང་དཀྱུས་ཤིག་ཡིན་ཡང་འཚོ་བ་ཧ་ཅང་སྐྱོ་པོ་ཡིན།  འོན་ཀྱང་ཁོང་ལ་ཐུན་མོང་མ་ཡིན་པའི་ཁྱད་ཆོས་ཤིག་ཡོད་པ་ནི་སྨྲ་ལྕེ་ཤིན་ཏུ་བདེ་ལ་དྲན་རྣོ་བ།  གོ་བདེའི་ཕལ་ཚིག་གི་ཐོག་ནས་འཕྲལ་འཕྲལ་དུ་ཚིག་བཅད་དང་ཀ་བཤད་ངག་རྩོམ་ཐུབ་ཀྱི་ཡོད།  གཤམ་ལ་སྐྱིད་ཟུར་ལགས་དང་འབྲེལ་བའི་ཤོད་སྲོལ་ཐོར་བུ་འགའ་ངོ་སྤྲོད་ཞུ་རྒྱུ་ཡིན།

 ༡༽ཉིན་ཞིག་སྐྱིད་ཟུར་ལགས་སྤྲོ་སྣང་ཆེན་པོས་སྦག་ཆེན་རྒྱག་སྐབས་ཁོང་གིས་སན་ཅིང་རྒྱག་ཐུབ་པ་བྱུང་བ་རེད།  སྐབས་དེར་ཁོང་གིས་ཅིང་གསུམ་པོ་དེ་སྦག་ཅོག་སྟེང་ཤུགས་ཀྱིས་བརྡབས་པ་དང་ཆབས་ཅིག་ཁ་ནས།  པར་བཅུ་ང་བདུན་སྨན་གསུམ་ཚ་ཐུད་སྟེར་བ་འབད།  ཨོ་ལོས་རིན་སྤུངས་རྫོང་དེ་སག་སྟེ་ཁ་ལ་ཞུས་པ་འབད་ཅེས་ཟེར།  དེའི་གོ་དོན་ནི་སྐྱིད་ཟུར་ལགས་ཀྱིས་ལོ་གཅིག་ཙམ་རིང་ཕར་གཡར་ཚུར་གཡར་བྱས་ཏེ་བོད་དངུལ་ཊམ་རྡོ་ཉི་ཤུ་ཐམ་པ་བྱུང་བ་རེད།  དེ་ཐོག་ནས་ཁོང་གིས་པར་ཁང་ལ་ཊམ་རྡོ་བཅུ་དང་།  ང་ཕོད་ལ་ཊམ་རྡོ་བདུན།  སྨན་རིན་ཊམ་རྡོ་གསུམ་བཅས་སྐྱབས་རྟེན་དུ་ཕུལ་ནས་རིན་སྤུངས་རྫོང་དེ་རང་ལ་རག་རྒྱུའི་དོན་སྨིན་སོན་པ་དང་ཚ་རོང་ལ་ཐུད་རིལ་སྟེར་ཐུབ་བྱུང་སྙམ་པ་ཡིན།  འོན་ཀྱང་སྐུ་དྲག་གཞན་ནི་སྐྱིད་ཟུར་ལགས་ལས་འབྱོར་པ་བརྒྱ་བསྒྱུར་གྱིས་རྒྱས་པ་ཡོད་གཤིས།  རིན་སྤུངས་རྫོང་རྩིས་སྤྲོད་རྩིས་ལེན་མ་ཟིན་གོང་སྐྱིད་ཟུར་ལགས་ཀྱི་འབུལ་བ་ལས་ལྷག་པ་གཞན་གྱིས་ཕུལ་སྟབས་བཀའ་ཤག་ནས་བཀའ་བཏང་སྟེ་ཁྱོད་ལ་རིན་སྤུངས་རྫོང་ཡོང་གི་མ་རེད།  འཕྲལ་དུ་ལྷ་སར་ཕྱིར་ལོག་བྱ་དགོས་བརྗོད། སྐྱི ད་ཟུར་ལགས་ཁོང་ཁྲོའི་མེ་ལྕེ་འབར་བཞིན་ཞབས་པད་བཤད་སྒྲའི་སྐུ་མདུན་དུ་བཅར་ནས་རྒྱུ་རྐྱེན་བཀའ་འདྲི་ཞུ་དགོས་སྙམ་ཡང་དེར་བལ་པོའི་ཚོང་དཔོན་སྐུ་དྲག་མང་ཆེ་བ་དང་འདྲིས་གཤིབ་ཆེ་བ་ཞིག་སྐུ་གམ་དུ་ཡོད་པས་བཀའ་འདྲི་ཞུ་སྟབས་མ་བདེ།  ཡུད་ཙམ་སོང་རྗེས་ཁོང་གིས་བཤད་སྒྲར་མཇལ་དར་ཞིག་བཏང་ནས།  ཁོ་བོ་དབྱུང་བའི་བྱེད་གཏེ་སུ་ཞིག་ལགས་བརྗོད་པར།  བཤད་སྒྲས་རལ་པའི་ཐོར་ཚུགས་ཅན་ནི་མ་ཡིན་ནོ།  དམར་སེར་གོས་ཀྱི་ཀླུབ་པ་ཞིག་ལགས་སོ་གསུངས།  དེ་ནི་སྐྱིད་ཟུར་ལགས་ཀྱིས་ཁོ་བོ་གནས་དབྱུང་གཏོང་མཁན་བྱེད་གཏེ་སུ་ཡིན་བཀའ་འདྲི་ཞུས་པར་བཤད་སྒྲས་དྲུང་འཁོར་ནི་མ་ཡིན།  རྩེ་དྲུང་ཞིག་ཡིན་འདུག་ཅེས་བཀའ་ལན་གནང་མོད།  འོན་ཏེ་དེར་ཡོད་བལ་པོའི་ཚོང་དཔོན་དེས་ནི་ཁོང་གཉིས་ཀྱི་གླེང་མོལ་ཚིག་གཅིག་གོ་བ་མ་ལོན་པར་མགོ་རིལ་རིལ་དུ་བསྡད་དོ།

ཡང་ལོ་གསར་མཛད་སྒོའི་སྐབས་གསོལ་རྐང་ཞེས་པའི་ཤ་སྐལ་སྤྲོད་དུས་སྐྱིད་ཟུར་ལགས་ལ་ཀུ་རེའི་ཆེད་དུ་ལུག་མགོ་ཀླད་པ་མེད་པ།  མིག་རིལ་མེད་པ།  ལྕེ་མེད་པ།  ཤ་མེད་པ་ཞིག་ཐེངས་ཁ་ཤས་སྤྲད་པ་རེད།  ཉིན་ཞིག་ཡང་བསྐྱར་ལུག་མགོ་དེ་འདྲ་ཞིག་སྐྱིད་ཟུར་ལགས་ལ་སྤྲོད་པར་ཡོང་བས་སྐྱིད་ཟུར་ལགས་ཁྲོས་ཏེ་ལུག་མགོ་སྤྲོད་མཁན་དེར་མིག་འབུར་ཚུགས་སུ་བལྟས་ནས།

ཀ་ཡེ་ཀླད་མེད་ཤ་མེད་འཛུམ་ཚེར་ཚེར། །

ཁ་ནང་ལྕེ་མེད་འགྲམ་སྟོང་ནག་ཧུར་ཧུར། །

ག་ལྟས་མིག་མེད་ལུགས་མགོ་སྐམ་པོ་འདི། །

ང་ལ་མི་དགོས་ལྟོགས་རྒྱལ་ཁྱོད་རང་ཟོ། །

ཞེས་ཟེར།  དེ་རྗེས་གསོལ་རྐང་སྤྲོད་མཁན་གྱིས་ཀུ་རེ་བྱས་ཏེ་ཁོང་ལ་ཤ་སྐལ་རྩ་བ་ནས་མ་སྤྲད་པ་རེད།  དེར་བརྟེན་ཉིན་ཞིག་ཁོང་གིས་གསོལ་རྐང་སྤྲོད་མཁན་དེར།  ལ་ཡི་འོག་དང་ས་ཡི་གོང་།  ལང་བ་དེ་མེད་པ་སྐྱོ་ཞེས་སྨྲེ་ངག་འདོན།  གསོལ་རྐང་སྤྲོད་མཁན་དེས་ཀ་མད་སུམ་ཅུའི་གོ་རིམ་ཐོག་ཤ་མེད་པ་ཟེར་མོད།  དོན་དུ་ཁོ་རང་གི་ཤ་སྐལ་ཆད་པར་ཟེར་བ་གོ་བ་ལོན།

  ༢༽རྒྱུན་དུ་མཛད་སྒོའི་སྐབས་སྐུ་དྲག་མཐོ་བ་རྣམས་ལ་ཤིང་རྟོག་ཨ་མྲ་སོགས་ཡག་པ་དང་།  དེ་འོག་རིམ་བཞི་སོགས་ལ་དེས་ལས་ཞན་ཙམ་གྱི་བྱི་རིལ།  དཀྱུས་མ་རྣམས་ལ་ཁམ་བུ་དཀྱུས་མ།  དམའ་ཤོས་རྣམས་ལ་ཁུ་ར་སྐྱ་ཁུར་མ་གཏོགས་སྒྲིག་སྲོལ་མེད་སྟབས་སྐྱིད་ཟུར་ལགས་དམའ་ཤོས་ཀྱི་གྲས་ཡིན་པས་སྐྱ་ཁུར་མ་གཏོགས་རག་གི་མེད་པས་ཁོང་གིས།

ཨ་མ་དང་ནང་མ་ཁ་སྤྲོད་རེད།

སེ་རིལ་དང་བྱི་རིལ་ཁ་སྤྲོད་རེད།

ཁམ་དཀྱུས་དང་དྲུང་དཀྱུས་ཁ་སྤྲོད་རེད།

སྐྱིད་ཟུར་དང་སྐྱ་ཁུར་ཁ་སྤྲོད་རེད།

ཅེས་སྐད་ཤུགས་ཆུང་ངུས་བརྗོད་པས་བཞུགས་གྲལ་གྱི་མི་རྣམས་དབང་མེད་དུ་གད་མོ་སིག་སིག་ཤོར་བ་དང་།  མགྲོན་ཆེས་བཀའ་བཀྱོན་གནང་དོགས་ཀྱི་འཇིགས་སྣང་བཅས་ཀྱིས་མཛད་སྒོ་མགྱོགས་ཙམ་གྲོལ་ན་ཅི་མ་རུང་སྙམ་པ་བྱུང་།

 

༣༽ཡང་སྐྱིད་ཟུར་ལགས་ཀྱིས་སྐབས་རེ་སྔགས་འདོན་ཁུལ་བྱེད།  གཞན་གྱིས་ཁྱོད་ཀྱིས་སྔགས་དེ་ག་རེ་རེད་བརྗོད་པར་ཁོང་གིས་དེ་ནི་ཁོ་བོར་སེམས་གནག་བྱེད་མཁན་རྣམས་ཧུམ་ཤི་ཕགས་འགྱེལ་དུ་གཏོང་བའི་མཐུ་སྔགས་ཤིག་རེད་ཅེས་བརྗོད།  ཡང་གཞན་གྱིས་སྔགས་དེ་སྐྱོར་དང་བརྗོད་པར་ཁོང་གིས་སྐྱོར་དོན།  རྭ་ཛྭ།  པར་ཛྭ།  ཧོར་ཛྭ།  རྡོ་ཐལ་ཡེ་ཕཱ།  སྐུ་མདའ།  སྐུ་རུ་སོགས་ཧུམ་ཕགས་བརྗོད།  དེ་དོན་ནི་སྔགས་ག་ལ་ཡིན།  རྭ་སྒྲེང་ཛ་སག་དང་།  པར་ཁང་ཛ་སག  ཧོར་ཁང་ཛ་སག  རྡོ་རིང་ཐའི་ཇི།  སྐུ་སྲུང་མདའ་དཔོན།  སྐུ་སྲུང་རུ་དཔོན་བཅས་ཀྱིས་རྒྱུན་དུ་སྐྱིད་ཟུར་ལགས་ལ་ཀྱག་ཀྱག་བྱས་སྟབས་ཁོང་གིས་དེ་དག་གི་མིང་ཟུར་སྔགས་ཡིན་ཁུལ་དུ་དྲངས་ནས་སྐུ་རེའི་ཆེད་དུ་ཧུམ་ཤི་ཕགས་འགྱེལ་གྱི་སྨོད་བོར་ཁུལ་བྱས་པ་ཞིག་རེད།

 

༤༽ཡང་ཉིན་ཞིག་ཞབས་པད་བཀྲས་མཐོང་གི་རྒྱལ་སྒོར་སྐྱིད་ཟུར་ལགས་ནས་ཡི་གེ་འགའ་བྲིས་པར་བཀྲས་མཐོང་པས་སྐྱིད་ཟུར་ཞེས་པ་དེའི་སྡུག་ལག་བྲེག་དགོས་ཚོད་ཅིག་འདུག་ཟེར།  དེ་དོན་སྐྱིད་ཟུར་ལགས་ཀྱིས་གོ་ནས་བཀྲས་མཐོང་པ་མཆོད་མཇལ་དུ་འགྲོ་སྐབས་སྐྱིད་ཟུར་གྱིས་ཀྱང་སྔོན་ཙམ་དུ་སོང་ནས།  བཀྲས་མཐོང་པ་མ་རིག་པའི་ཚུལ་གྱིས་སྒྲོལ་མ་འདོན་ཁུལ་ངང་འདི་ལྟར་བརྗོད།

ང་ནི་བླ་བྲང་སྟེང་གི་དྲུང་འཁོར་ཡིན་མ།

གཞུང་དོན་ཞ་ཆག་མེད་པ་ཞུས་མ།

སྡུག་ལག་གང་གི་དོན་དུ་བྲེག་མ།

ཞེས་བསྐྱོར་བས་བཀྲས་མཐོང་པ་དབང་མེད་དུ་གད་མོ་ཤོར་བ་རེད།

 

༥༽ཡང་དྲུང་སྤྱི་དབྱར་སྐྱིད་ཀྱི་ཐུགས་སྤྲོའི་སྐབས་སུ་ཞབས་པད་ཚོས་སྐྱིད་ཟུར་ལགས།  ཞབས་བྲོ་ཞིག་སྐྱོན་དང་ཞེས་ལབ།  སྐྱིད་ཟུར་ལགས་ཀྱིས་ཞབས་བྲོ་བརྒྱབ་སྟེ་གཞས་ཚིག་ལ།

ཕག་ཤ་རྙིང་པ་རྡོས་བརྡུངས།

རྡོའི་འོག་ནས་ལང་རྒྱུ་མེད།

དེང་སང་རྡོ་ལ་འགྲན་ཟླ་མེད།

གཅིག་གཉིས་གསུམ། གསུམ།

ཞེས་གསུམ་རྒྱག་ཅིག་བརྒྱབ་པ་རེད།  དེའི་གོ་དོན་ནི་ཞབས་པད་ཕོ་ལྷ་དང་།  བཤད་སྒྲ།  བླ་བྲང་རྙིང་པ།  རྡོ་རིང་བཅས་ལ་སྙད་ནས་རྡོ་རིང་ཁ་ཤུགས་འཇོན་ཐང་གཉིས་ཀ་ལྡན་པས་གཞན་རྣམས་རྡོ་རིང་འོག་ལ་འདུར་དགོས་པ་བཟོ་ཡི་འདུག་ཟེར་བའོ།

 

༦༽ཡང་སྐྱིད་ཟུར་ལགས་ལ་འདྲིས་ཆེ་བའི་རྩེ་དྲུང་དཔྲལ་ཉག་རྒྱ་བོ།  གདོང་པ་ཐེར་ལ་ཁ་ལ་མཛེར་པ་རྡོག་རྡོག་གསུམ་བྱས་པ་ཞིག་ཡོད་པས་ཁོང་གིས།  སྐྱིད་ཟུར་ཁྱེད་ཀྱིས་ང་ལ་མིང་འདོགས་ཤིག་ཐོགས་དང་བརྗོད་པར།  སྐྱིད་ཟུར་ལགས་ནས་དེ་ནི་ཤིན་ཏུ་ལས་སླ་ཞེས་བསམ་བློ་ཙམ་མ་བཏང་བར་ཆུ་རྒྱུག་པ་ལྟར་བཤད་པར།

ཀ་པ་ལི་དེ་ཉག་ཉག་བྱས།

ཁ་ཡི་སྟེང་དུ་ཐེབས་ཆི་གསུམ།

ག་ཐེར་རྩིད་པའི་མཐུར་འགོ་ཅན།

ང་ལས་མདོག་ཉེས་སུ་འདུག་ལྟོས།

ཞེས་བརྗོད་པར་རྩེ་དྲུང་ཁོང་ཁ་སྐྱེངས་པར་གྱུར།

 

༧༽ཡང་ཉིན་ཞིག་ཞོལ་ལྕང་མ་ཁང་གསར་གྱི་རྩེ་ཕྱག་ལོ་ན་མཐོ་ཙམ།  ཤ་རྩི་སྔོ་ལ།  མགོ་སྐྱ་ཕྱེད་སྔོ་ཕྱེད་ཅིག་ཡོད་པ་ཁོང་རྟ་སྔོ་ནག་ཅིག་ལ་བཞོན་ནས་འགྲོ་སྐབས་ལྕང་གསེབ་ཤར་དུ་རྟས་དབྱུགས་ནས་གྲྭ་ཤམ་ཡར་ལོག་པ་དང་ཞྭ་མོ་བསེ་ཐེབས་དེ་ལའང་སེར་ཁ་གས་པ་རེད།  དེ་དུས་སྐྱིད་ཟུར་ལགས་དང་ཏག་ཏག་ཐུག་པས་སྐྱིད་ཟུར་ལགས་ཀྱིས་གང་མིན་བྱས་སོང་ཞེས་ཐལ་རྡུལ་བརྡབ་བརྡབ་བྱས་ནས་སློང་རོགས་བྱས།  རྩེ་ཕྱག་དེས།  ང་ལ་མི་ཁ་ཟུག་པ་རེད།  སྐྱིད་ཟུར་ནས་མི་ཁ་དགྲ་ལྡོག་ཅིག་འདོན་རོགས་བརྗོད།  སྐྱིད་ཟུར་ལགས་ཀྱིས་ལོ་ལས་སེ།  ད་ལྟ་ལམ་སེང་འདོན་ཆོག་ཅེས་ལག་པའི་ཐལ་མོ་ཏག་སྒྲ་དང་བཅས་འདེབས་ཤིང་སྐད་ཤུགས་ཆེན་པོས།

རྩེ་ཕྱག་རྟ་ཡིས་དབྱུགས་པ་དགྲ་ལ་ཟློག

རྟ་སྔོན་མི་སྔོན་དབྱུགས་པ་དགྲ་ལ་ཟློག

མགོ་སྔོན་ཐལ་འཚུབ་འཁྱིལ་བ་དགྲ་ལ་ཟློག

རྐུབ་སྔོན་གནམ་སྔོན་མཐོང་བ་དགྲ་ལ་ཟློག

སྣམ་དམར་རྒྱལ་མཚན་གྱི་འོག་ནས།

ཤ་དམར་གྱི་ཏོག་གསུམ་མཐོང་བ་ཟློག་ཏུ་གསོལ།

རྟགས་དང་མཚན་མ་ངན་པ་འདི་དག་ཟློག་གྱུར་ཅིག

ཅེས་བརྗོད་པས་ཁྲོམ་ལམ་གྱི་མི་རྣམས་ནི་རྩེ་ཕྱག་ལ་མཚེར་སྣང་སྐྱེས་པ་དང་།  སྐྱིད་ཟུར་ལགས་ལ་བལྟས་ནས་གད་མོས་གྲོད་པར་ཟུག་གཏང་དགོས་པ་བྱུང་།

 

༨༽རྒྱུན་དུ་སྐྱིད་ཟུར་ལགས་ལ་ཞོགས་པ་བུ་ལོན་བདའ་མཁན་མང་དྲགས་ནས་རྟག་ཏུ་མཛད་རྗེས་ཟིན་གྱི་མེད་སྟབས་ཉིན་ཞིག་མགྲོན་ཆེས་བཀའ་བཀྱོན་གནང་བ་རེད།  དེར་སྐྱིད་ཟུར་ལགས་སེམས་ཤིན་ཏུ་སྐྱོ་པོ་བྱུང་སྟེ་མིག་ཆུ་ཐིགས་པ་ཕྲུལ་ཕྲུལ་དུ།  ལྷ་དགོངས་དྭངས་པ་ཞུ།  ཁོ་བོའི་མིང་ལ་སྐྱིད་པོ་ཟུར་དུ་བསྡད་པ་ལྟར་སྣང་ཡང་།  དོན་དུ་སྡུག་པོའི་དཀྱིལ་དུ་ཚུད་པ་རང་ཡིན།  ཞོགས་ལྟར་སྐྲ་གྲངས་ཆུ་གཉེར་ལྟར་གྱི་བུ་ལོན་བདའ་མཁན་རྣམས་ལ་ཁ་ཡ་བྱེད་དགོས་པས་མཛད་རྗེས་མ་ཟིན་པ་ལས།  གཞུང་ས་དགའ་ལྡན་ཕོ་བྲང་ལ་ཁྱད་བསོད་སྒལ་རལ་ཞུས་པ་རྩ་བ་ནས་མིན་ཞེས་སླར་ཡང་མིག་ཆུ་བཏང་།  མགྲོན་ཆེས་འོ་ན་ཁྱེད་ཀྱིས་དངོས་པོ་ཇི་ཡོད་དངོས་ཐོ་རྫུན་སྤངས་བདེན་འཛིན་ཞིག་ཁྱེར་ཤོག་གཞུང་ས་ནས་ཐུགས་ཁུར་གཟིགས་བསྐྱངས་འདྲ་ཡོང་སྲིད་པས་སྐྱབས་མགོན་སྦུག་ལ་སྙན་སེང་ཞུ་ཆོག་གསུངས།  སྐྱིད་ཟུར་ལགས་ནས་བཀའ་དྲིན་བླ་མེད་དུ་ཆེ་ཞེས་དངོས་ཐོ་འདི་ལྟར་ཀ་ཕྲེང་ལྟར་བྲིས།

ཀ་བའི་ལོག་ལ་རྟ་མགོ་སྤུས་ལེགས་གཅིག །

ཁ་ཤའི་ལྤགས་པའི་ཇ་ཁུག་མགོ་འབྲེལ་གཅིག །

ག་སོང་བློ་སྐྱོག་ཆུང་འདྲིས་སྙིང་སྡུག་གཅིག །

ང་རའི་དུས་ཀྱི་ཐུག་ཁོག་ལུང་ཆག་གཅིག །

ཅ་གས་བསྐྱངས་པའི་མེ་ཏོག་ཁོག་མ་གཅིག །

ཆ་མེད་ཡ་མེད་རྟ་སྒྲོ་སྙིང་སོང་གཅིག །

ཇ་ཁུ་སྡིར་བྱེད་ཨུ་ལུ་ཁ་དུམ་གཅིག །

ཉ་ཤ་གཙབ་བྱེད་ཨན་རྡར་གས་ཆག་གཅིག །

རྟ་མེད་སྒ་མེད་སྲབ་སྨད་ཆད་དུམ་གཅིག །

ཐ་མག་གང་ཟག་ཐང་ཁུག་རང་འགྲིགས་གཅིག །

ད་ལྟ་ཟ་བྱེད་ལ་ཕུག་ཆག་པ་གཅིག །

ན་རྟེན་ཤི་རྟེན་གཡང་ཊམ་དཀར་པོ་གཅིག །

པ་ཕའི་དུས་ཀྱི་འབོག་ཐོ་རྙིང་སོང་གཅིག །

ཕ་མའི་དུས་ཀྱི་ཁ་གདན་རལ་པོ་གཅིག །

བ་མོ་མེད་པའི་འོ་ཟོ་རྐུབ་ལུག་གཅིག །

མར་འདྲ་བྱུང་ན་བླུག་བྱེད་མར་ཀག་གཅིག །

རྩྭ་ཡིས་བརྒྱངས་པའི་འབོལ་གདན་རྙིང་རུལ་གཅིག །

ཚྭ་ཁུག་ནང་དུ་ཚྭ་རྡོག་ཆུང་ངུ་གཅིག །

ཛ་ཛོར་བླུག་སའི་ཤིང་སྒམ་ཁེབས་མེད་གཅིག །

ཝ་ནག་ཞྭ་མོ་མུག་པས་བཟས་པ་གཅིག །

ཞ་ཐུལ་སྤུ་ཟད་རྒྱབ་ཤ་རལ་པ་གཅིག །

བཟའ་བཏུང་བྱེད་པའི་ལྷོ་རོང་སྐྱ་ཕོར་གཅིག །

འབ་རྒྱུ་མེད་པའི་རྒྱ་ཁྱི་ཐིག་རལ་གཅིག །

ཡ་དོ་མེད་པའི་རྡོ་གཏུན་གཏོང་རིང་གཅིག །

རྭ་ཅོའི་ཡུ་བའི་གྲི་ཆུང་ལེགས་ཙམ་གཅིག །

ལ་ཕུག་བརྡར་སའི་ལབ་རྡར་ཟད་ཏོ་གཅིག །

ཤ་ཚལ་བྱུང་ན་གཏུབ་བྱེད་ཚལ་ཏའོ་གཅིག །

ས་ཁྲིའི་སྟེང་དུ་བཙུགས་ཕྲུག་སྤུ་ཟད་གཅིག །

ཧ་ཅང་གཅེས་པའི་གཡུ་རྩིའི་ཁོག་ལྡིར་གཅིག །

ཨ་མས་བསྐུར་བའི་བུ་རམ་རྩྭ་སྒོར་གཅིག །

དེ་མིན་རིན་ཐང་ཆེ་བ་གང་ཡང་མེད། །

ཅེས་བྲིས་ཏེ་ཕུལ་བར་གོང་ས་སྦུག་ནས་གཟིགས་རྗེས་བཀའ་དྲིན་དགོངས་བཞེས་གནང་ལུགས་བརྗོད་སྲོལ་ཡོད་དོ།

 

༩༽ཉིན་ཞིག་སྐྱིད་ཟུར་ལགས་སྒོ་རྒྱབ་ཏུ་ཐུག་པ་སྐོལ་ནས་སྡོད་པའི་སྐབས་མི་ཞིག་གིས་སྐྱིད་ཟུར་ལགས་འདིར་ཅི་ཞིག་གནང་གི་ཡོད་དམ་ཞེས་དྲིས་པས།  སྐྱིད་ཟུར་ལགས་ཀྱིས་སྒོ་ནང་དུ་ཐུག་པ་རྣམས་གསུམ་སྐོལ་གྱི་ཡོད་ཅེས་ལན་བཏབ༼ རྣམ་གསུམ་སྟེ། ཆུ། རྩམ་པ། ཚྭ་བཅས་སོ། ༽

 

༡༠༽

 ཀ་ཡེ་ཕྱོགས་བཅུར་བཞུགས་པའི་བུན་བདག་རྣམས། །

ཁ་ཐབས་སྐྱིད་ཟུར་ང་ལ་སྤྱན་གཟིགས་དང་། །

ག་ནས་བལྟས་ཀྱང་སྤྲོད་རྟེན་མི་འདུག་པས། །

ང་ཡི་ཐེའུ་འདི་ལ་བརྩི་འཇོག་དགོས། །

ཞེས་པའི་ཤོ་ལོ་ཀ་འདི་ནི་ཏཱ་ལའི་བླ་མ་སྐུ་ཕྲེང་བཅུ་གསུམ་པས།  གྲྭ་བཞི་སྐྱིད་ཟུར་པར་ཕ་མེས་ནས་བསྡད་པའི་བུ་ལོན་ཆེན་པོ་ཡོད་པ་མཁྱེན་ནས་ཁྱོད་ཀྱིས་བུན་བདག་དང་།  བུན་འཇལ་མཁན།  སྤྲོད་དམིགས།  བུན་ཆག་གཏོང་མི་བཅས་ཀྱི་དོན་རྣམས་ཀ་བཤད་ཤོ་ལོ་ཀ་གཅིག་གི་ནང་བྲིས་ཐུབ་ན་བུན་འཇལ་མ་དགོས་པའི་ཐམ་ཀ་བརྒྱབ་འཐུས་བཀའ་འཁྲོལ་གནང་བ་བཞིན་བརྩི་འཇོག་དགོས་ཞེས་པའི་ཡིག་མཇུག་ཏུ་སྦུག་དམ་བསྩལ་ཡོད་པ་དེས་སྐྱིད་ཟུར་གྱི་བུ་ལོན་སྤྲད་མ་དགོས་པ་བྱུང་བ་རེད་ཅེས་ཤོད་སྲོལ་འདུག  ཡང་དོན་གཅིག་པའི་ཀ་བཤད་འབྲི་སྲོལ་མི་འདྲ་བ་གཞན་ཞིག་སྣང་བ་ནི། 

ཀ་ཡེ་འབྱོར་ལྡན་བུན་བདག་ལྷན་རྒྱས་སུ། །
ཁ་ཙམ་མིན་པར་སྐྱིད་སྡུག་ཟུར་པ་ངར། །
ག་ནས་བལྟས་ཀྱང་སྤྲོད་རྟེན་མེད་ངེས་ལ། །
ང་ཡི་ཐེའུ་འདི་ཡིས་འཐུས་པར་མཛོད། །

 

༡༡༽སྤྱི་ལོ ༡༢༠༠ ནང་སྐྱིད་ཟུར་ལགས་སྟོད་ཕྱོགས་སུ་རྫོང་དཔོན་དུ་བསྐྱོད་པ་རེད།  དེ་རྗེས་ཁོང་རྩེ་གཉེར་བསྐོས་ནས་ལྷ་སར་འཕྲལ་དུ་འབྱོར་དགོས་པའི་བཀའ་རྒྱ་མང་པོ་བཏང་ཡང་མ་འབྱོར་བས།  མཐར་བཀའ་ཤག་གིས་སྐྱིད་ཟུར་ཆེད་འགུགས་ཨ་དྲུང་བཏང་ནས་ལྷ་སར་འབྱོར་མཚམས་སྐྱིད་ཟུར་ལ་ཉེས་ཆད་གཅོད་རྒྱུའི་གཏན་འབེབས་བྱས་པ་རེད།  དེ་རྗེས་སྐྱིད་ཟུར་ལྷ་སར་འབྱོར་ནས་ཁོ་པར་ཉེས་ཆད་གཅོད་རྒྱུའི་གྲོས་འགོ་འདོན་མཁན་སུ་ཡིན་རྩད་གཅོད་བྱས་ཏེ་དེའི་སར་བཅར་ནས་ཉེས་ཆད་མ་དགོས་པའི་ཐབས་ཤེས་ཤིག་བྱེད་བསམ་པ་ལྟར།  སྐྱིད་ཟུར་གྱིས་ཁོ་པའི་གྲོགས་པོ་བཀའ་དྲུང་ཞིག་ཡོད་པར་དེ་ལ་དྲིས་བསམས་ནས་བཀའ་ཤག་གི་འཁྲིས་སུ་བཀའ་དྲུང་སྒུག་བསྡད་པ་རེད།  གང་མཚམས་ཤིག་ལ་བཀའ་ཤག་གྲོལ་བས་བཀའ་དྲུང་དེ་བར་སྐོར་ནང་ཁ་ཆེའི་ཚོང་ཁང་ཞིག་གི་ནང་དུ་བསྡད་ཡོད་པ་རེད།  སྐབས་དེར་སྐྱིད་ཟུར་གྱིས་ཞྭ་མོ་ཕུད་ནས་བཤད་དོན།  ཀྱེ།  ཁོ་བོའི་བགྲོད་བྱེད་སྐྱུར་བ་བྱེད་པའི་སྨྲ་བའི་གཙོ་བོ་སུ་ཞིག་ལགས་དྲིས་པས་བཀའ་དྲུང་དེས་བསམ་བློ་ཞིག་བཏང་བ་དང་།  སྨ་རར་བྱིལ་བྱིལ་བྱས་ནས་བཤད་དོན།  དགའ་བ་བརྒྱ་ལྡན་མདུན་ན་འཛིན་པའི་མདོ་མཁར་རྨ་བྱའི་གཙུག་ཕུད་ཅན་དེ་གདའ་བ་ལགས་ཞེས་བརྗོད་པར།  སྐྱིད་ཟུར་གྱིས་ལགས་སོ་ཞེས་ཕྱིར་ཐོན་པ།  མདོ་མཁར་ཞབས་པད་ཀྱི་སར་ཕྱིན་ནས་ཉེས་ཆད་མ་དགོས་པའི་སྐྱབས་འཇུག་ཞུས་པ་རེད། །

༼རྩོམ་སྒྲིག་ངག་དབང་།༽
ལོགས་སུ་ཉར་བ།  

ནོར་བུ་ག...

西藏人物

མི་སྣའི་...